Famous Poetry

Ali Sardar Jafri

raat Khuubsurat hai niind kyuN nahiiN aatii

din kii Khashmagi nazrein kho gayii siyaahii meN
aahnii kaRoN kaa shor, beRioN kii jhankaareN
qaidioN kii saaNsoN kii tund-tez aavaazeN
jailaroN kii badkaari, gaalioN ki bauchhaareN
bebasii kii Khaamoshii, Khaamoshi kii faryaadeN, tahnashiin andhere meN

shab ki shoKh doshiizaa Khaardaar taaron ko
aahniiN hisaaroN ko paar kar ke aayii hai
bhar ke apne daaman meN jangaloN kii Khush-buueN
ThandakeN pahaaRoN kii mere paas laayii hai

raat Khuubsurat hai niind kyuN nahiiN aatii

neelguuN jawaaN seena, neelguuN jawaaN baaheN
kahkashaaN kii peshaanii, neem chaaNd ka juuRaa
maKhmalii andhere kaa, pairahan laraztaa hai
waqt ki siyaah zulfeN Khaamoshi ke shaanoN per
Kham-ba-Kham mahaktii haiN aur zamiiN ke hontoN per
narm shabnamii bosay, motioN ke daantoN se KhilKhilaa ke haNste haiN

raat Khuubsurat hai niind kyuN nahiiN aatii

raat peing letii hai, chaaNdnii ke jhuule meN
aasmaan par taare nanhe-nanhe haathoN se
bun rahe hain jaaduu saa
jhingaron ki aavaazeN, kah rahi hain afsaana
duur jail ke baahar baj rahii hai shehnaaii
rail apne pahioN se loriaaN sunaatii hai

raat Khuubsurat hai niind kyuN nahiiN aatii

roz raat ko yuNhii niind meri aankhon se
bewafaaii kartii hai
mujhko chhoR kar tanhaa jail se nikaltii hai
Bambayii kii bastii meN mere ghar ka darvaaza jaa kar KhatKhataati hai
ek nanhe bacche kii ankhRioN ke bachpan meN
miithe miithe KhwaboN ka shahed Ghol detii hai
ik hansiiN parii ban kar paalnaa hilaati hai loriaaN sunaatii hai

ek khwaab aur

khwaab ab Husn-e-tasavvur ke ufaq se haiN pare
dil ke ek jazbaa-e-ma’suum ne dekhe the jo khawaab

aur ta’beeroN ke tapte hue sehraaoN meN
tashnagii aabla-paa, sh’ola-bakaf mauj-e-saraab

ye tau mumkin nahiin bachpan ka ko’ii din mil jaaye
yaa palat aaye ko’ii sa’aat-e-naayaab-e-shabaab

phuuT nikle kisii afsurdah tabassum se kiran
yaa damak uTThe kisii dast-e-buriidah meN gulaab

aah ! patthar kii lakiireN haiN ke yaadoN ke nuquush
kaun likh saktaa hai phir umr-e-guzishtaa kii kitaab

beete lamHaat ke soye hue tuufaanoN meN
tairte phirte haiN phuuTii huii aaNkhoN ke Habaab

taabish rang-e-shafaq, aatish ruu-e-Khurshiid
mal ke cHehre pe saHar aayii hai KhuuN aHbaab

jaane kis moR pe, kis raaH meN kyaa beetii hai
kis se mumkin hai tamannaoN ke zakhmoN ka Hisaab

aastiinoN ko pukaareNge kahaaN tak aaNsuuN
ab tau daaman ko pakaRte haiN lahuu ke gardaab

dekhtii phirtii hai ek ek ka munh khaamoshii
jaane kyaa baat hai sharmindah hai andaaz-e-Khitaab

dar-ba-dar thokareN khaate huve phirte haiN savaal
aur mujrim ki tarah unse gurezaaN haiN javaab

sarkashii, phir maiN tujhe aaj sadaa detaa huN
maiN teraa shaa’iir-e-aawaaraa-o-be-baak-o-Kharaab

pheNk phir jazbaa-e-betaab ki aalam pe kamand
ek khwaab aur ai himmat-e-dushwaar pasand

shikast-e-shauq ko takmeel-e-aarzuu kahiye

shikast-e-shauq ko takmeel-e-aarzuu kahiye
ke tishnagii ko bhi paimaan-o-subuu kahiye

khayaal-e-yaar ko deejiye wisaal-e-yaar ka naam
shab-e-firaaq ko gesoo-e-mushk.buu kahiye

charaaGh-e-anjuman hairat-o-nazaara haiN
laala.ruu jinheiN ab baab-e-aarzuu kahiye

shikaayateiN bhi bahut hain hikaayateiN bhi bahut
mazaa tau jab hai ke yaaroN ke ruu-ba-ruu kahiye

mahak rahi hai Ghazal zikr-e-zulf-e-khuubaaN se
naseem-e-subH kii maanind kuu-ba-kuu kahiye

ai hukm keejiye phir Khanjaron ki dilzaarii
jahaan-e-zakhm se afsaana-e-guluu kahiye

zubaan-e-shoKh se karte hain pursish-e-aHvaal
aur uske baad ye kahte haiN aarzuu kahiye

Qitaa

hai zakhm zakhm magar kyuN na jaaniye use phuul
lahuu lahuu hai magar kyuN use lahuu kahiye

samajhiye qaamat-e-yaaraan-e-kaj.adaa ki tarah
??? paaye nigaaraaN ???

jahaaN jahaaN bhi khizaaN hai wahiiN wahiiN hai bahaar
chaman chaman yahii afsaanaa-e-numuu kahiye

zamiiN ko deejiye dil-e-mud’daa talab ka payaam
khizaaN ko wus’at-e-daamaan-e-aarzuu kahiye

saNwaariye Ghazal apnii bayaan-e-Ghalib se
zabaan-e-Meer meiN bhi haaN kabhuu kabhuu kahiye

magar wo harf dhaRakne lage jo dil ki tarah
magar wo baat jise apnii guftaguu kahiye

magar wo aaNkh ke jismeiN nigaaH apnii ho
magar wo dil jise apnii justujuu kahiye

kisi ke naam pe Sardar kho chuke haiN jise
usi ko ahl-e-tamanna kii aabruu kahiye